#Jetztmalklartextaugsburg ÖPNV Augsburg – D Strossaboh

Social Media zeigt uns die schöne, perfekte Welt. Regenwolken einfach weggetanzt, Pickel unter einer Tonne Make-Up weggezaubert und schleicht sich doch mal ein Bad-Mood-Moment ein, laufen wir ihm auf dem Laufband einfach davon und zeigen ihm unsere stahlharten Mukkis – natürlich gefiltert. Augschburger Mischdweddr? Ach nicht so negativ – lasst es uns beim Lach-Yoga einfach weglachen. Der Nachbar nervt? Positiv denken und dankbar sein! Hä, was? Ja das frage ich mich langsam auch und plädiere für mehr Augschburger-Authentizität – und mache darum den Anfang. Ich rede Klartext und zeige euch, was manchmal in mir vorgeht. Denn es gibt Dinge an Augsburg, die nerven nun mal und ich als Augschburgerin kann das nicht weglächeln, sondern muss es weggrantln – mal laut und mal leise. )

I will doch nur von A nach Beee!

„Neues Jahr, neues Glück.“ So hab i mir des dacht, als i neulich nomml nen Versuch mit dene Öffendliche gschdardet hob. I wollt von Oberhausen in Spickel nüber. Mei, mitm Audo däts scho au gehn, aber mei Freund wohnt so sau bleed, da is mit Parkplädz halt immer schwierig. Für was hammer denn in Augschburg au a Strossaboh, wenn ned nur dafür, dass’s  auf der Stroß laut schebbert wenns über die alten Gleise fahrt und dafür dass d Audos dahinter Schlange stehn, weil eigenes Gleisbett gibt’s ja au kaum. Naja, des is a andre Gschicht.

Auf jeden Fall, i also in Oberhausen an der Wertachbrücke nei ind Vierer. Geht ja schneller als die Zwoa, weil die immer hinda rum fahrt übern Dom. Naaaa, des dauert mir echt z’lang. Guad also eingschtiegn und dann hab i recht bled gschaut: fährt die Vierer zum Senkelbach. Schrei i zum Fahrer „Ja was fahrsch denn zam?“, schreit dr zruck „Wenns dr ned basst,steig halt aus!“

„Ja des wär dir scho recht“…..

hab i mr denkt und bin natürlich hocka blieba. Bis zum Kö – da kenn i nix. Ewig hats dauert. War wiedr irgendwas auf der Linie 4, deshalb ist die a Umleitung gfahra. Des kenn ma ja scho. Mir Augschburger müssen da scho echt was mitmachn und da wundert ma sich, dass ma au omal grandig daherschaun.

Also mir ankommen, i schnell raus aus der Vierer und nei ind Sechser, die nach Friedberg naus fahrt. Ja da stands ja scho am Bahnsteig C2, da Richtung Hermannstroß hin halt. Übern Kö bin i grannt, vorbei an dene ganze Leud die da so rumwuseln. Des ist mr immer z‘viel los, na!, des mog ined wenn da alle so eng an eng an der Haltestelle stehn und di zum Schluss no anrempeln. I also schnell hin zur Sechser, hör no „Biiiep Biiiep Biiiep“, Tür zu, i davor. I druck auf n Knopf und schimpf dabei, aber nix. D Strossaboh fahrt ohne mi los. Des is scho so a Augschburg-Ding und kann dr au nur in Augschburg passiera. Mir sind halt scho einzigartig! 😉

I also gwartet aufd Nächschde. Natürlich war se zspät, wie immer halt. Dann steig i ein und ja klar, lauter junge Leit drin, machen an morz Krach. Mei, o no Schulschluss grad. Subber echt, hätt i ja ned besser derwischen können. I mi durchquetscht durch die jungen Banausen und hinghockt. Is euch scho a mal aufgfalln, dass die Sitze echt sowas von sauunbequem sin? Und die Bezüge, die Farben. Ja herrgott also no bunter wärs ned gangen, oder?

Elf Minuten musst i des mitmachen, dann war i endlich am Eiskanal. Und dann halt no fünf Minuten zfuß weiter bis in Spickel nei, weil da fährt natürlich nix direkt hin, ge. Triff i am Weg an alten Mo, lächelt der mi o und sagt „Mei, a scheenes Wetter hammer heut, Sonnenschein im Januar.“ I nur „Ja an Sonnenbrand wird mer scho kein kriegen.“ Sonne im Januar, als ob des a gscheite Sonne wär. Na, also echt. Hab i dann au glei meinem Freund erzählt als i da war. Sagtr „Ja spricht der di einfach so o? Lauter komische Leit gibt’s nur no.“ Der versteht mi halt.

Zruck bin i übrigens mitm Taxi, des hab i mir ned noml geba. Aber deier war die Fahrt, i sags eich. Wenn ihr mir also wissts, wo’s nächschte Woche Kartoffler und a weng a Rindfleisch im Angebot gibt für an guaden Eintopf, dann sagts mr Bscheid – des spar i scho wieder nei. Und wenn i d Brezen beim Ihle holen muss, isma au recht!